لا للتحرش الجنسى

بسم الله

انا اول مرة اكتب تدوينة فا استحملونى و الله الموفق والمستعان.
الفرق بين الانسان و الحيوان ان الانسان يتحكم فيه عقله اما الحيوان تتحكم فيه "غرائزه"

يعنى ايه تحرش؟؟؟ تحرش يعنى امك او اختك او مراتك او بنتك حد يضايقهم بكلمة , بايده , بعينه او بحاجة تانية مثلا... تقولى امى او اختى او بنتى او مراتى انا؟؟؟ اقولك اه (شومان ستايل) المهم ان انت امك واختك عارفهم مراتك وبنتك فى علم الغيب (لو انت مش متجوز) يعنى اى واحدة ماشية فى الشارع ممكن تبقى مراتك فى يوم من الايام .. او مراة اخوك او صاحبك صح؟؟؟ طيب طالما هو صح ليه لو شفت اى بنت فى الشارع حد بيضايقها متوقفلوش؟؟ ما تيجى كده نحافظ على اختى واختك امى وامك مراتك ومراتى مش يمكن لو وقفت مع امى انهاردة اقف مع امك بكرة؟؟؟ او اختك او مراتك؟؟؟خصوصا فى ظل حالة الانفلات الامنى الموجود فى الشارع والكلاب السعرانة اللى كترت فى الشارع .....و الحياة سلف ودين زى ما بيتقال.

فاكرين يوم 25 يناير لما طلعنا فى الشارع قولنا اول حاجة ايه؟؟؟ كانت كلمة حرية .. حرية يعنى حرية راى, فكر , دين , و معيشة يعنى حريتك و حريتها اقصد البنت ...

طيب يعنى انت متفق معايا ان البنت حرة حرة انها تمشى فى الشارع حاسة بالامان حرة انها تمشى فى الشارع لابسة اللى هى عايزة تلبسه (اكيد مش هتمشى ببكينى فى الشارع) ... طيب ليه تطلع يوم 25 تقول عايز حرية بلد و مستخصر فى بنت حريتها و تنتهكها بكلمة او نظرة لمجرد انها حلوة و لابسة مفتوح مثلا ... تيجى تقولى ما لو اى واحدة ماشية لابسة عريان كده فى الشارع تستاهل اللى يجرالها اقولك يبقى انت همجى و تفكيرك عقيم , تقولى ليه بس كده؟؟ اقولك هو انت كده غبى عشان هى حرة زى مانت حر تقولى احنا مجتمع شرقى اقولك برضو هى حرة ...

نيجى بقى لنقطة تانية ... فى رجالة تقولك البنات مش مضمونين اليومين دول ممكن تكون الواحدة اغتصبت مثلا قبل كده انا هعرف منين؟؟ طيب لو عرفت هتعمل ايه؟؟ ايه السؤال ده يعم اكيد هسيبها وهو انا هتجوز واحدة اغتصبت قبل كده؟؟ طيب يعنى هى راحت للكلب ده وقالتلوا اغتصبنى يا مان بليز؟؟؟ هى مش ذنبها على فكرة انها تشيل غلطت واحد قذر بلا نخوة طول حياتها و انت مش من حقك انك حتى تلومها عشان لو هنشييل واحد ذنب حاجة هو ملوش دخل بيها يبقى مش هنخلص.

بالنسبة بقى للبنت .. لازم حاجز الخوف و الكسوف و الخوف من الفضيحة والحساس بالخزى والعار يتكسر و اى واحدة يحصلها اى حاجة تبلغ عشان تاخد حقها و لو واحدة حصلها حاجة وسكتت يبقى هى بتدى الكلب ده فرصة تانية انه ييجى على شرف بنت تانية عشان هو عارف انها هتخاف من الفضيحة و العار ومش هتبلغ تقوليلى احنا فى مجتمع شرقى و مينفعش,, يبقى اقولك البسى بقى لبس المجتمع الشرقى ومتمشيش براحتك فى الشارع مش عايزين اللى على مزاجكم و تسيبو اللى مش على مزاجكم p:

حصل من كام يوم مع واحدة اعرفها طريقة تحرش جديدة من نوعها ولاداعى لذكر تفاصيل منعا لخدش الحياء بس انا قررت من ساعتها ان انا لو شفت اى بنت بتتعاكس فى الشارع هقف للكلب اللى بيعاكسها عشان زى ما قولنا فى الاول انها ممكن تكون امك او اختك او مراتك او مراتى فى المستقبل ... قررت انى اعامل اى بنت فى الشارع زى ما بعامل اختى واللى مرضهوش لاختى مش هرضاه لاى بنت .. قررت كدة عشان عندى نخوة و النخوة والرجولة لا يتجزائوا راجل يعنى عندك نخوة معندكش نخوة تبقى مش راجل ...

نفسى كل الشباب يبقوا كده ونحافظ على البنات و السيدات فى الشارع و نفسى البنت تبلغ عن اى حالة تحرش بس يعنى مش يقولك يا عسل و ياقمر تروجحى تبلغى كده مش هنخلص P:

و نفسى فى قانون يجرم التحرش وتكون عقوبته جامدة توصل لاعدام وبقول التحرش ومش الاغتصاب عشان اكيد اللى اغتصب لازم يعدم. 

ويااااااااااااااااارب ترجع اخلاق الميدان فى حياتنا الطبيعية كلنا 

اسف لو كنت طولت بس كان نفسى اكتب اكتر من كدة بس عشان وقتكم


شكرا